Қазақстан Республикасының Мемлекеттік рәміздері

«Қазақстан Республикасының Мемлекеттік рәміздері туралы» Конституциялық Заң 2007 жылғы 4 маусымда қабылданды. Осы Заңға сәйкес жыл сайын 4 маусым Қазақстан Республикасында Мемлекеттік рәміздер күні ретінде мерекеленеді. Мемлекеттік рәміздер — мемлекеттің егемендігі мен біртұтастығын бейнелейтін, оның ажырамас атрибуттарының бірі. Қазақстан Республикасының Мемлекеттік рәміздері — Мемлекеттік Ту, Мемлекеттік Елтаңба және Мемлекеттік Гимн.

ҚАЗАҚСТАН РЕСПУБЛИКАСЫНЫҢ МЕМЛЕКЕТТІК ЕЛТАҢБАСЫ

Қазақстан Республикасының Мемлекеттік елтаңбасы шетінен күн сәулесі тарап тұрған көгілдір түс аясындағы шаңырақ (киіз үйдің жоғарғы күмбез тәрізді бөлігі) бейнесінен тұрады. Шаңырақтың оң жағы мен сол жағында аңыздағы қанатты тұлпарлар бейнеленген. Жоғарғы бөлігінде бес бұрышты жұлдыз, ал төменгі бөлігінде «QAZAQSTAN» деген жазу бар. Жұлдыздың, шаңырақтың, уықтардың, аңыздағы тұлпарлардың бейнесі, сондай-ақ «QAZAQSTAN» жазуы — алтын түсті.

ҚАЗАҚСТАН РЕСПУБЛИКАСЫНЫҢ МЕМЛЕКЕТТІК ТУЫ

Қазақстан Республикасының Мемлекеттік Туы — ортасында шұғылалы күн, оның астында қалықтап ұшқан қыран бейнеленген тік бұрышты көгілдір түсті мата. Тудың сабының тұсында ұлттық өрнек тік жолақ түрінде нақышталған. Күн, оның шұғыласы, қыран және ұлттық өрнек бейнесі — алтын түсті.

ҚАЗАҚСТАН РЕСПУБЛИКАСЫНЫҢ МЕМЛЕКЕТТІК ГИМНІ

Бұрын «Менің Қазақстаным» әні ретінде танымал болған Қазақстан Республикасының Мемлекеттік Гимніне Президент Нұрсұлтан Назарбаевтың бастамасымен 2006 жылғы 6 қаңтарда Парламентте тиісті түзетулер енгізілді. Жаңа Гимн алғаш рет 2006 жылы 11 қаңтарда Президенттің ұлықтау рәсімінде орындалды.